KrioLUS (Sonsente)

KrioLUS ê  un metáfora de konhesimente,  un palavra-txave ke ta juntá  kriol + lus (lus na sentide de konhesimente, má tanben de investigasãu pa deskubérta de más konhesimente, relasionóde ma kriolístika y ma kriole de Kabeverde – KKV).

Désde final de sékle XVIII até grinhasin, KKV foi matéria de txeu dezinformasãu y de txeu mal-entendide. Un sélebre Anónimu de 1784, sitóde pa António Carreira (na sê livre O Crioulo de Cabo Verde – surto e expansão, 1985), na karta pa Rei de Portugal, el tá dezê kemá até própe kes jente ke ben de Portugal («reinóis») ja kustemá ke linga de térra y ja es skesê purtugês (op.cit.). Désde kel momente,  alguns purista de purtugês komesá ta  otxá KKV móda un mei de komunikasãu sen régra nen gramátika, un mantxulada ke ka ta dá pa skrevê y nen el ka ten kes létra inportante d’alfabétu, móda  L  de lei, R de rei, F de .  Pa tude ise, es tava oiá  KKV  móda un prige pa unidade de Inpériu.

Depôs enton, alguns kabeverdiane komesá ta defendê kemá ensine de KKV ta jedá   kriá alguns konfuzãu na metodolojia de ensine de purtugês  y   kontribui pa sê própe dezofisializasãu. Ote koza prigoze  inda éra kónde es tava pensá kemá ensine de KKV tá  levá  pa izolamente y pa ostrasisme de nos país.

Ta kontesê ke tude es argumente ka ten fundamente sientífike, nen pedagójike, ja ke linga matérne de kualker pove é medjor referénsia na aprendizájen tónte  de un linga segunde kome  de un linga stranjer.

Móda Baltasar Lopes tava dezê (1957 y 1984:43, Lisboa, INCM) , Kabeverde komesá mute sede ta ten un linga de unifikasãu própe, diferente de purtugês. Relasionóde ke autonomia de KKV, el dezê ke sertéza: «[…]  mi, N ta otxá kemá komande de linguájen na Kabeverde fejí de mon de patrãu europeu. Ja ke «reinol» (kes pure ke ka tinha kontaminasãu tropikal) es éra un minoria, foi ome kriole  ke inpô sê própe linga;  y reinol  ka otxâ ote manera senãu ´akulturá ses  kabésa’ idiomatikamente (…) y, posivelmente,  mute sede kriole pasá ta ten un strutura koerente y un vokabuláriu sufisiente pa nesesidades de komunikasãu; de ese manera, mute sede, móda ta parsê-me, ome kriole komesá ta sentí idiomatikamente ‘autosufisiente’ […]».

Ê mistide sublinhá es rekonhesimente de «autosufisiénsia idiomátike» referide pa Baltasar Lopes (op. cit.), realasionóde ke un linga ke « mute sédu komesá ta stabilizá na konteste de  stória de Kabeverde».

Aoje, linga kabeverdiane  ê, kada vês más, obejete de stude, na ánbite stritamente linguístike, má  tanben na otes ária, móda siénsias de edukasãu. Na verdade, inportánsia de linga kabeverdiane kome linga de tude dia, de kultura y de siénsia ê, realmente, tratóde  atravês de txeu stude sientífike  ke ja foi  realizóde ô ti ta ser realizóde na país y na stranjer, ke obejetive de pô ese linga na preokupasãu pedagójike y sientífike de Nasãu Kabeverdiane.

Asin, siénsia ka ta tolerá dezinformason  ô  informason marióde, de naturéza linguístike, kultural, sosial ô polítike.

KrioLUS  krê ser un lugar  de «lus» ondê siénsia ta falá ke fundamente y ta fundamentá pozisãu ke el ta difendê.  Nos intensãu  ê kriá un spase virtual ondê dosentes, na un primer momente, y mestrandes na un segunde momente, podê publiká trabóie, senpre ke preokupasãu sientífike,  na  kónpe de kriolístika  y de linga kabeverdiane.

No podê, kazu spiriénsia ben ser pozitive, kriá lugar  pa mestrandes fazê purgunta  y konsigí respósta de dosentes, y própe  públike,  en jeral, podê koloká pergunta y otxá respósta.

Ese dinámika podê, eventualmente, levá-nos  abrí  un ote spase onde públike en jeral podê koloká perguntas pa dosentes ô  pa mestrandes  y respósta ta ser dóde désde ke ses  ajénda ta permití.

No krê pa KrioLUS trazê más lus pa siénsia de kriole. Y se no konsegí  pô sê farol luminoze ta brilhá na tude txada y monte, na tude ladera y ribera de nos térra, no podê konsiderá kemá sê misãu foi kunpride.

Komisãu de Mestróde na Kriolístika Y Linga Kabeverdiane

Traduson ke partisipason de alunes de profesóra Dominika  Swolkien, na Sonsente

Deixe uma Resposta

Preencha os seus detalhes abaixo ou clique num ícone para iniciar sessão:

Logótipo da WordPress.com

Está a comentar usando a sua conta WordPress.com Terminar Sessão / Alterar )

Imagem do Twitter

Está a comentar usando a sua conta Twitter Terminar Sessão / Alterar )

Facebook photo

Está a comentar usando a sua conta Facebook Terminar Sessão / Alterar )

Google+ photo

Está a comentar usando a sua conta Google+ Terminar Sessão / Alterar )

Connecting to %s