Nóta di Abertura

KrioLUS  é  un metáfora di kunhisimentu,  un palavra-tronku ki ta reúni kriolu + lus (lus na sentidu di kunhisimentu, mas tanbe di investigason pa diskubérta di más konhisimentu, relasionadu ku kriolístika y ku kriolu di Kabuverdi – KKV).

Di final di séklu XVIII ti gósi, KKV foi matéria di txeu dizinformason y di txeu interpretason distorsedu. É si ki un sélebri Anónimu di 1784, sitadu pa António Carreira (na si livru O Crioulo de Cabo Verde – surto e expansão, 1985), na karta pa Rei di Purtugal,  ta flaba ma ti própi fidjus di Purtugal («reinóis») dja kustuma ku manera di pâpia di téra y dja  es skese di purtugês  (cit). Désdi kel momentu la, alguns purista di purtugês komesa ta konsidera KKV un meiu di kumunikason sen régra nen gramátika, un kalanbetxada ki ka ta da pa skrebe y nin e ka ten létras inportanti di alfabétu, sima L di lei, R di rei, F di fé.  Pa tudu kel-la, es ta konsideraba KKV  un prigu pa unidadi di Inpériu.

Más pa frenti na ténpu, alguns kabuverdianu komesa ta difende ma ensinu di KKV ta kontribui pa kria alguns konfuzon na metodolojia di ensinu di purtugês  y mesmu pa si dizofisializason. Otu kusa gravi inda éra óki es ta pensaba ma ensinu di KKV ta kontribuiba pa izolamentu y pa ostrasismu di país.

Es tipu di argumentu  ka ten fundamentu sientífiku, nen pedagójiku. Sta provadu ma  língua matérnu di kalker povu é midjór referénsia na aprendizájen kér di un língua sugundu, kér di un língua stranjeru.

Sima Baltasar Lopes ta flaba (1957 e 1984:43, Lx, INCM) , Kabuverdi, sédu na ténpu, komesa ta ten un língua di unfikason própi, diferenti di purtugês . Relasionadu ku autonomia di KKV, el afirma: «[…]  sima N ta pensa, kumandu di linguájen na Kabuverdi fuxi di mon di patron europeu. Unbês ki «reinol» (kes puru ki ka tenba kontaminason tropikal) éra un minoria, foi ómi kriolu ki inpô si própi língua;  y «reinol»  ka atxa otu fórma sinon ‘akultura si kabésa’ idiomatikamenti (…) y, pusivelmenti,  mutu sédu kriolu pasa ta ten un strutura koerenti y un vokabuláriu sufisienti pa nisisidadis di kumunikason; di es manera, mutu sédu, sima ta parse-m, ómi kriolu komesa ta xinti idiomatikamenti ‘autosufisienti’. […]».

Nu meste sublinha es  rekonhisimentu di «autosufisiénsia idiomátiku» referidu pa Baltasar Lopes (op. Cit.), relasionadu ku un língua ki « mutu sédu komesa ta stabiliza na kontestu di  stória di Kabuverdi.

Oxi, língua kabuverdianu é, kada bês más, obijétu di studu, na ánbitu stritamenti linguístiku, mas tanbe na otus ária, sima siénsias di idukason. Na verdadi, inportánsia di língua kabuverdianu komu língua di tudu dia, di kultura y di siénsia, é, realmenti, tratadu  através di txeu studu sientífiku  ki dja realizadu ô sa ta realizadu manenti na país y na stranjeru, ku obijetivu di inskreve es mesmu língua na preokupasons pedagójiku y sientífiku di Nason Kabuverdianu.

Óra, siénsa ka ta npâlia ku dizinformasons  ô  ku informasons distorsedu, di naturéza linguístiku, kultural, sosial ô polítiku.

KrioLUS  krê ser un spasu di «lus» na undi siénsia ta pâpia ku fundamentu y ta fundamenta pozisons difendidu.  Nos intenson  é ranja un spasu virtual undi dosentis, na un purmeru momentu, y mestrandus na un sugundu momentu, pode publika trabadjus, sénpri ku preokupason sientífiku,  na  kanpu di kriolístika  y di língua kabuverdianu.

Nu pode, kazu spiriénsa ben ser pozitivu, kria spasus pa mestrandus koloka purguntas y konsigi raspóstas di dosentis, y mesmu públiku, en jeral, pode koloka perguntas y atxa raspóstas.

Es dinámika pode, eventualmenti, leba-nu abri un otu spasu undi públiku, en jeral, pode koloka purguntas pa dosentis ô  pa mestrandus  y raspósta ta ser dadu désdi ki ruspetivu ajénda ta pirmiti.

Nu krê pa KrioLUS traze más lus pa siénsia di kriolu. Y si nu konsigi pô si farol luminozu ta brilha na tudu txada ku kutélu, na tudu ladera ku rubera di nos téra, nu pode konsidera ma si mison foi kunpridu.

Kumison di Mestradu di Kriolístika

Traduson ku partsipason di aluna Karina Moreira

Deixe uma Resposta

Preencha os seus detalhes abaixo ou clique num ícone para iniciar sessão:

Logótipo da WordPress.com

Está a comentar usando a sua conta WordPress.com Terminar Sessão / Alterar )

Imagem do Twitter

Está a comentar usando a sua conta Twitter Terminar Sessão / Alterar )

Facebook photo

Está a comentar usando a sua conta Facebook Terminar Sessão / Alterar )

Google+ photo

Está a comentar usando a sua conta Google+ Terminar Sessão / Alterar )

Connecting to %s